Ólafur Ragnar og cosmosinn

Ég er ekki að segja neinar fréttir þegar ég segi að við Bóndinn séum einsog svart og hvítt. Við eigum nákvæmlega ekkert sameiginlegt hvað persónueinkenni varðar.

Venjulegir dagar hjá okkur eru mikið til svona:

Ég:  spyr, gagnrýni, kem með tillögur, hlæ, græt, hoppa, segi sögur, læt mig dreyma, pæli í öllu, set mér markmið oft á dag, er á þeysingi, skipulegg, skilgreini, tek inn á mig allt úr umhverfinu, skipti um skoðun… og ætlast til að Bóndinn taki þátt í þessu öllu.

Bóndinn: lætur sér fátt um finnast og heldur sínu striki, gerir það sem hann þarf að gera og gerir það vel.. og ætlast ekki til neins af mér nema að klóra sér á bakinu.

Ég, pælarinn, hef oft reynt að skilgreina okkur:
Við erum einsog blaðra sem er fest við jörðina með spotta. Ég er blaðran, Bóndinn er jörðin og spottinn er sambandið á milli okkar. Þannig get ég flogið, farið og komið og gert það sem mér dettur í hug. Bóndinn passar að missa ekki spottann og ef ég er orðin of háfleyg þá styttir hann í spottanum. Ég sé miklu meira en hann svona hátt uppi og reyni að koma skilaboðum niður á jörðina, en það virðist oft sem þau skili sér ekki alla leið.

Væmið ? Veit. Ræð ekki við þetta.

Ég hef oft verið að leita að mér, en hvar ætli tvær “blöðrur” myndu enda ?

Ég held að Bóndinn lesi ekki bloggið mitt, honum finnst nóg um allar pælingarnar hérna heima. Auk þess sem hann hefur lært að láta þetta fara inn um annað og út um hitt (mér til lítillar gleði) og halda sínu striki.
En ef hann rekst inn á þetta (ég á eflaust ekki eftir að geta leynt þessu) þá mun ég líklega heyra: “Kristín, hefuru nú ekkert merkilegra að segja en þetta. Plís, vertu ekki að blanda mér í þetta”.

Reyndar gerir hann oft grín að mér og lætur mig heyra hversu kjánaleg ég er að litast af öllu sem er að gerast í kringum mig og halda að ég geti breytt heiminum… og svo er bara eldhúsið allt í drasli !

,,Kristín, þú ert bara einsog Ólafur Ragnar og cosmosinn. Ég get svo svarið það!”

 

Sínus

Ég var búin að skrifa ofurvæmna færslu. Þar sem ég sagði of margt gott um sjálfa mig.

Það var ógeðslegt þegar ég las það yfir aftur. Oj. Hitti víst á balance punktinn, sem gerist frekar sjaldan. Ég er soddan sínusbylgja, skaðræði fyrir þá sem standa mér næstir.

Ég t.d. tuðaði í hálftíma við Bóndann um 4 kartöflur. Veit ekki hvort það er pínu fyndið eða bara hallærislegt. Eða jafnvel sorglegt ?

Annars vorum við að fjalla um teymi í skólanum í dag. Ég er sannfærð um að við  Bóndinn séum stórgott teymi. Í alvöru og þrátt fyrir allt. Við bætum hvort annað upp á öllum sviðum.

Ég tala, hann hlustar. Ég öskra, hann þegir. Ég fer, hann bíður. Ég fer á flug, hann jarðtengir. Ég hugsa, hann gerir.

Spurning fyrir hvort okkar lífið sé erfiðara ?

 

Hopp og hí

Við Jón Ágúst skelltum okkur austur á Höfn um helgina. Þar átti að vera Humarhátíð en mér fannst fara minna fyrir hverskyns hátíðarhöldun. Veðrið var heldur ekki að sýna sínar bestu hliðar. En þrátt fyrir það var gaman að koma í gamla bæinn sinn og upplifa raunveruleikann. Í minningunni var Höfn stór bær með gríðarlegum vegalengdum. Ég var lítil stelpa í stórum heimi.

Í öðrum fréttum þá eru 2 vikur liðnar af 10 vikna áskoruninni. Mæling nr. 2 var að klárast og mínar niðurstöður eru hreint ekki til að monta sig yfir. Stelpurnar standa sig samt vel -og mun betur en ég reyndar. Nú þarf ÉG að taka mig á !
Alls hafa fokið 2.1 kg, fituprósentan hefur lækkað um 3.3% og 12 cm horfið af okkur fjórum í heildina.

Ég reyni líka að vinna einsog ég mögulega get. Er að vinna 10-11 tíma á dag svo dagarnir eru frekar einhæfir: hjóla í vinnuna, vinn, hjóla í ræktina, æfi, borða og sef.

Ætla núna að drífa mig og taka brennslu í ræktinni yfir So you think you can dance. Ekki veitir af.. Ég ætla að sýna góðan árangur í næstu mælingu !

…ætla að enda þetta á smá syrpu sem við tókum um helgina á leiðinni austur. Vorum með smá þema: hopp á klukkutíma fresti. Myndirnar eru teknar (í þessari röð) við Seljalandsfoss, Skógarfoss, Lakagígahraun, Skeiðarársand, Jökulsárlón og undir rótum Vatnajökuls.

   
Seljalandsfoss                 Skógarfoss                     Lakagígahraun

  
Skeiðarársandur          Jökulsárlón                    Klettar við rætur Vatnajökuls

 

Postulínsbrúðkaup

Fyrir 20 árum síðan átti sér stað þessi stórviðburður..

Elsku mamma og pabbi, innilega til hamingu með 20 ára brúðkaupsafmælið !

Í brúðkaupsgjöf fengu mamma og pabbi m.a. postulínskökukefli með uppskrift að hamingjuuppskrift. Sú uppskrift hefur verið uppi við öll þessi 20 ár og hefur verið höfð í hávegum, enda hafa þau borið þetta á borð fyrir alla sem þau mæta.. rétt einsog uppskriftin segir.

2 sléttfullir bollar af þolinmæði
1 hjartafylli af klærleika
Slatti af hlátri
Höfuðfylli af skilningi
Vætið örlátlega með góðvild, látið nóg af trú og blandið vel.

Breiðið yfir þetta heilli mannsævi.
Berið á borð fyrir alla sem þið mætið.

p.s Ég skammast mín ekki lengur fyrir allt kossaflensið í ykkur fyrir framan vini mína þegar ég var yngri. Nú skil ég að þetta er bara ást.

 

17. júní

             

             

             

Ótrúlegt að liðin séu 2 ár !

Til hamingu með daginn allir MA-stúdentar !
Og svosem allir aðrir Íslendingar líka -þetta er víst þjóðhátíðardagur okkar allra.

 

Þessi væmni

 
Síðustu 17 dagar…                          Á morgun…

Komandi tímar…

 

Að skemmta sér

Vikan hefur verið ansi þéttskipuð og einstaklega skemmtileg. Nýja prógrammið tekur vel í og lætur manni líða gífurlega vel. Æfing nr. 9 verður tekin á eftir en sunnudagarnir eru semsagt skemmtileg útivist að eigin vali og ég ætla að hjóla út á Seltjarnarnes á ,,fund”. En það er ekki bara ræktin sem heldur mannin uppteknum heldur kúrsinn í skólanum, Nýsköpun og stofnun fyrirtækja.  Ég fékk æðislegan hóp að vinna með og við eigum að leggja fram viðskiptaáætlun í menningarklasa. Skil á viðskiptahugmynd var á föstudaginn og skil á áætluninni verður eftir 2 vikur. Þetta er án efa sá skemmtilegasti kúrs sem ég hef farið í og ég nýt mín í botn.

Annars fékk ég fast skot á mig í gær. Ég var að hjálpa litla bró að læra stærðfræði fyrir prófin hans þegar hann segir: “Hlakkaru ekki til að fara snemma að sofa, vakna hress í fyrramálið og taka góða æfingu eftir að hafa borðað hollan mat ?” Þeir sem ekki skilja kaldhæðnina í þessu (þótt hann vildi meina að hún væri ekki til staðar) þá er þetta ég í hnotskurn flesta daga og honum finnst þetta heldur betur boring life. Og það finnst eflaust mörgum. Djamm, drykkja og skyndibiti eru að margra mati samheiti yfir að skemmta sér og láta sér líða vel. Eigum við að fara út að skemmta okkur ? túlkast hjá flestum sem Eigum við ekki að detta í það og fara niður í bæ ?
Af einhverjum ástæðum hef ég aldrei fílað þessa íslensku drykkjumenningu. Fitta ekki inn. Vill frekar fara út að skemmta mér edrú í góðra vina hópi – og sleppa vitleysunni, þynnkunni og sveitta matnum. Eða hafa það gott heima með góða fólki. Live a little segja sumir og meina þá að maður eigi aðeins að sleppa af sér böndunum. En ég vil meina að þetta sé Live a lot, þegar maður getur skemmt sér á heilbrigðan hátt.  
Ég elskaði menningun í Brasil. Hittast á strandbörunum, fá sér kokteil og spjalla fram á rauða eða hittast með kassagítar, kveikja varðeld, spila og syngja. Þetta er því miður ekki lenska hér (enda engir strandbarir og óleyfilegt að kveikja varðeld).

Veit ekki alveg hvort þetta sé afsökun fyrir að nenna ekki að detta í það. Er bara búin að vera að pæla í þessu, þ.e. hvað veldur því að ég vel frekar að borða hollt, hreyfa mig og leggja metnað í það sem ég geri ? Fullkomnunarárátta, stífni, þrjóska ? Markmið kannski sem maður stefnir á að ná ?

Væri gaman að heyra komment frá ykkur sem lesið (sem er ört stækkandi hópur, 100-200 manns á dag) ástæður fyrir því að þið skemmtið ykkur einsog þið gerið. Bæði frá þeim sem djamma og djúsa hverja helgi og þeim sem gera það sjaldnar. Munur á því að vera á föstu eða single ? Í íþróttum eða ekki ? Hverju er verið að sækjast eftir með skemmtuninni ?

 

The greatest obstacle in life is you

Í dag er fyrsti sumardagurinn og í dag er líka mánuður síðan ég ákvað að hætta að borða nammi og hreyfa mig markvisst. Það hefur gengið svona líka vel enda hef ég ekki snert nammi eða aðra óhollustu og hreyfði mig 30x á 31 degi. Síðasta prófið er á morgun og eftir  það ætla ég að eiga nammidag -og taka svo annan nammilausan mánuð með enn meiri hreyfingu.

Reyndar verður næstu 3 vikur ansi stífar þar sem ég verð í kúrs í skólanum sem heitir Nýsköpun og stofnun fyrirtækja. Ég hlakka mikið til að taka hann og geri ráð fyrir að leggja mikla vinnu í gott verkefni. Vona bara að ég fái góðan hóp til að vinna með. Er viss um að þessar 3 vikur verði mjög krefjandi og skemmtilegar; fullar af skemmtilegri vinnu, vonandi góðum félagsskap, kraftmiklum æfingum og góðu og orkumiklu mataræði.

Undanfarinn mánuð og þá sérstaklega undanfarna daga hef ég verið að hugsa mikið um árangur, markmið og stefnu. Hvar stend ég, hvert vil ég komast og hvernig kemst ég þangað ? Ég hef lengi haft óljósar hugmyndir um að koma mér í form og gert það með hálfum hug og árangurinn hefur verið enginn. Mig hefur lengi langað til að vera virkari í félagslífi skólans auk þess að gera enn betur í náminu -en einhvernveginn hef ég ekki komið mér í það. Ég hef oft kennt utanaðkomandi ástæðum um, að það sé e-ð sem truflar þó ég viti ekki alveg hvað það er. Finnst ég alltaf verða að hafa e-ja ástæðu/afsökun fyrir að gera þessa hluti eða að einhver reki mig áfram.

Nú hef ég hinsvegar komist að breyttri niðurstöðu. Þetta er allt upp á sjálfa mig komið. Ef ég vil ná árangri þá verð ég einfadlega að hafa fyrir því að ná honum -og það MUN verða erfitt. Þó að vinur/vinkona/kærasti/fjölskylda hafi ekki sama áhuga á að ná þessum sama árangri eða hafi annað áhugasvið þá þýðir það ekki að ég geti ekki gert það sem mig langar til að gera. Þó að önnur manneskja velji að borða óhollt og nenna ekki að hreyfa sig þarf ég ekki að pirra mig á því, það er hvers manns val. Því þetta er allt í hausnum á manni.
The greatest obstacle in life is you !
Ef ég næ ekki þeim árangri sem ég vil ná þá er það ekki af því Kalli nennti ekki með í ræktina, af því Binna vildi fara á Pizza Hut eða af því Silli vildi frekar fara í bíó en að læra undir prófið. Það er einfalega af því Ég VALDI að gera þetta á þann hátt sem ég gerði.

Ég hef því ákveðið að velja mér þá leið sem ég vil, þ.e. daglega hreyfingu, hollt mataræði og taka þátt í öllu því sem ég hef áhuga á -burtséð frá því hvað aðrir ætla sér að gera.

Fyrir ári síðan skrifaði ég líka um val. Getið lesið það hér, ef þið hafið áhuga.

…og gleðilegt sumar !

(p.s það eru komnar inn nýjar “bumbumyndir”.)

 

Love is…

                                  

 

Hann bróðir minn

Mér var bent á þessa skemmtilegu frétt frá Selfossi. Á meðan ég hafði það gott og svaf á mínu græna hér í bænum leiddist sveitunga mínum og ákvað að kveikja í sér -bara svona að gamni. Þetta gerði hann fyrir utan Krónuna í Kjarnanum.

Ég benti bróa að lesa þessa frétt þegar hann skreið á fætur eftir hádegi. Hann las þessa frétt (og fannst hún fyndin) og las svo fyrir mig fyrirsagnir nokkurra frétta svona í leiðinni, þ.á.m. þessa, Krónan veikst með nýrri stjórn.

Þetta fannst honum ekki skrítið “enda kveikti maðurinn í sér fyrir utan Krónuna”.
—
Annars á hann pabbi minn afmæli í dag. Ungi maðurinn enn rétt rúmlega fertugur. Hann bauð okkur í tilefni dagsins að nýta okkur 7 kr. afmælisafslátt hjá Atlantsolíu.