Svínaflensan

Föstudagskvöldið síðasta fór ég heim með svínaflensu. Það er mesti viðbjóður sem hefur hent mig í mörg ár. Hiti, beinverkir, særindi í öndunarvegi, lystarleysi, höfuðverkur, verkir í augum og eyrum, bakverkir, hósti og hnerri. Einnig ógleði en hef þó aldrei getað kastað upp vegna særinda í hálsi og megn höfuðverkur af áreynslunni sem því fylgir.

Í dag er dagur fimm og ég er öll að koma til. Það “eina” sem angrar mig enn er hóstinn, ógleðin, særindin í hálsinum og lystarleysið -auk þess sem bragð -og lyktarskynið er horfið. Síðustu fimm daga hef ég borðað jafn mikið og ég geri venjulega part úr degi og því liggur það ljóst við að ég hef varla orku í að koma mér á milli herbergja. En þetta fer nú allt að koma, ég trúi ekki öðru.

Ef ég á að draga fram kosti síðustu daga þá hef ég náð að sofa meira en venjulega og ég hef ekki þurft að elda mat né þvo þvott alla þessa daga.

..æ, annars er ég orðin þreytt á þessari inni-og einveru. Verkefnalistinn er orðinn svo langur að ég sé ekki fyrir endann á honum.

Búhú og vælivæl. Þá er það búið.

 

Nútímadans

Ég er farin að láta hafa mig út í allskyns vitleysu. Í síðustu viku fór ég í hot yoga og í gærkvöldi í nútímadans. Þeir sem þekkja mig vita að þetta er ekki alveg minn stíll. Ég er meira svona hoppiskopp og action, ef þið skiljið hvað ég á við. Auk þess að vera laus við allan liðleika og mjúkar hreyfingar.

Oh well.

Er annars búin að koma hot yoga inn í stundarskrána 1x í viku til frambúðar en ég er enn að melta þetta með nútímadansinn. Að liggja á gólfinu einsog krossfiskur og teygja sig og fetta… Er það virkilega málið ?

Annars er gaman að prufa e-ð nýtt og öðruvísi. Áskorun -ég lifi fyrir þær ! 
Ég get varla verið endalaust slæmur nútímadansari ?

Þetta er nútímadans.
Þetta eru danshæfileikar mínir.

 

Hot Yoga

Ég og hot yoga kennarinn

Ég fór í fyrsta hot yoga tímann minn í dag. Ekki alveg minn tebolli.. EN ég og bakið mitt höfðum nokkuð gott af þessu. Og eftirá er þetta algjör unaður. Yoga, teygjur, heitt bað, góður kvöldmatur og lestur uppí rúmi þangað til ég sofna er fínasta fimmtudagskvöld. Reyndar er lestrarefnið fjármál fyrirtækja (próf á morgun), en það er ekki alslæmt.

Ég er líka ánægð með óvenju gott jafnvægi í tímanum. Kem mér sífellt á óvart. Hver veit nema ég fari kannski aftur að viku liðinni…

 

Heilsukeppni og bakstur

Síðasta posjónin af naan brauðum er inni í ofni. Byrjaði á að grilla þau í Gogga, en mér fannst þau of klesst. Er líka búin að baka bananaorkubrauð og hafraklatta auk þess að skella í kjúklingasalat sem var í hádegismat. Alveg tilvalið að nota mánudagsmorgun í bakstur þegar nánast allir tímar dagsins falla niður vegna ferðalaga kennara.

Þessi bakstur er þó ekki tilkominn af eintómum dugnaði. Hér á þessum bæ er allt gert for a reason, en í dag byrjaði formlega “heilsukeppni” okkar Jóns. Til að detta ekki í óhollustuna á löngum skóladögum (líkt og gerst hefur undanfarið með 1/2 kg af súkkulaðirúsínum á dag) mætum við í skólann með heimatilbúið, hollt og orkumikið nesti. Ísskápurinn er fullur af ávöxtum, skyri og kjúkling -og svo verða hafraklattar og orkubrauð smá uppbót.

“Heilsukeppnin” er líka komin til af gleðilegri ástæðu. Jón Ágúst hefur loks keypt sér árskort í ræktina og nú munið þið geta séð okkur bæði sveitt og sælleg í World Class. Þó líklega aldrei á sama tíma -við getum jú ekki sést hvort með öðru. En Jón er ekki þekktur fyrir að gera neitt tilgangslaust svo markið er sett hátt.
Ég stefni á að losna við 6 kg af fitu fyrir 20. desember og Jón Ágúst ætlar að vera búinn að bæta á sig 6 kg af vöðvamassa fyrir sama tíma (við erum svo mikið balance-fólk, að við viljum halda heildarþyngd okkar stögugri). Uppá ísskáp er komið blað með markmiðunum, bæði í orðum og myndum (!) og tafla þar sem árangurinn verður merktur inná vikulega. Einsog í öllum alvöru keppni eru verðlaun fyrir þann sem vinnur/nær betri árangri og þau eru ekki af verri endanum: Út að borða í Perluna í boði taparans + 1 klst í nudd.

Þið megið veðja á hvor vinnur !

 Var svo búin að lofa að skella hér inn uppskriftinni að bananabrauðinu. Þetta er búið að vera uppáhaldsuppskriftin mín lengi. Fékk hana í ræktinni minni úti í Brasil með því loforði að ég léti hana ekki fara lengra. Þar með svík ég það loforð, enda finnst mér að allir megi njóta hennar. Og þó, því ég finn ekki uppskriftabókina. Læt ykkur því fá hana eftir minni, en svona gerði ég brauðið í morgun..

Bananaorkubrauð

1 dl spelt
1 dl klíð (má líka vera spelt)
1 1/2 dl púðursykur
1 msk lyftiduft
2 msk kanill (eða bara dass)
1 egg
1/2 dl mjólk
1/2 dl olía
3 bananar

Þurrefnunum blandað saman. Síðan er olíu, mjólk og eggi (má sleppa, en gerir léttara) bætt við. Hrært vel saman, á að vera frekar blautt. 2/3 af deiginu sett í mót (ég nota svona ílangt brauðmót, en hægt að nota hvað sem er) og bananarnir skornir þvert/langsum í og tvennt/þrennt og settir ofan á degið. Restin af deiginu fer yfir.
Skellt inní ofn á 180° í ca. 50 mín.

Vola og verði ykkur að góðu..

 

If you fail to prepare, you prepare to fail

Ég er komin í frí. Ég er hætt að vinna og skólinn byrjar á fimmtudaginn. Fríið mitt nota ég í undirbúning – to do listinn stendur af nokkrum atriðum.

Skólaárið markar að vissu leyti nýtt upphaf, þetta eru einskonar tímamót. Ný verkefni hefjast og auðvitað skiptir máli að vera 100% tilbúinn að takast á við þau. Maður ætlar sér mikið -kannski of mikið- en til að eiga raunhæfan séns þá þarf skipulagið að vera gott, hugur og líkami í góðu jafnvægi og markmiðin skýr.

Ég efast um að ég sé ein með þessa þráhyggju um að ef eitt klúðrast þá er allt annað ónýtt (partur af “öfga-syndrominu” ?).
Ef íbúðin mín er ekki hrein og snyrtileg þá finnst mér ég ekki heldur vera hrein og snyrtileg. Ef ræktin situr á hakanum þá situr námið líka á hakanum. Ef það sem ég ætlaði mér að gera fer út um þúfur þá er allur dagurinn ónýtur. Ef ég borða eitt nammi þá get ég alveg eins borðað 100 nammi.

Þetta er náttúrulega fáránlegt.

Ég hef reynt að láta þetta ekki hafa svona áhrif á mig, en það er lífsins ómögulegt. So preparation it is !

To do:

• Þrífa íbúðina hátt og lágt -gera fallegt og kósý
• Skrá sig á heilsugæslustöð og panta tíma hjá lækni (laga bakið !)
• Fara yfir allan gamlan póst að heiman. Skipuleggja bókhald og almennt yfirlit
• Finna gamla bankareikninga og láta loka þeim sem eru ekki í notkun
• Kaupa allt sem vantar fyrir skólann
• Selja bækur
• Panta (og mæta) í klippingu og litun
• Fara í neglur (vei)
• Finna góðar uppskriftir og skipuleggja máltíðir fram í tímann
• Gera gott plan fyrir ræktina
• Klára alla undirbúningsvinnu (sem möguleg) fyrir Háskólablaðið
• Selja stofuborðið og finna annað minna í staðinn
• Hengja upp snaga/hillur/myndir á veggi
• Hafa tíma fyrir sjálfa mig !

Þessi vetur mun einkennast af jafnvægi: hæfilegur tími í skólanum og öðrum verkefnum, hæfilegur tími í ræktinni, hæfilegur tími fyrir fjölskyldu og vini, hæfilegur tími fyrir sjálfa mig, 

Með góðri skipulagningu ætla ég loks að finna þennan vandfundna gullna meðalveg.

[...þessi færsla er hluti af skipulagninunni: hún kemur hugsuninni niður á "blað"...]

 

Hopp og hí

Við Jón Ágúst skelltum okkur austur á Höfn um helgina. Þar átti að vera Humarhátíð en mér fannst fara minna fyrir hverskyns hátíðarhöldun. Veðrið var heldur ekki að sýna sínar bestu hliðar. En þrátt fyrir það var gaman að koma í gamla bæinn sinn og upplifa raunveruleikann. Í minningunni var Höfn stór bær með gríðarlegum vegalengdum. Ég var lítil stelpa í stórum heimi.

Í öðrum fréttum þá eru 2 vikur liðnar af 10 vikna áskoruninni. Mæling nr. 2 var að klárast og mínar niðurstöður eru hreint ekki til að monta sig yfir. Stelpurnar standa sig samt vel -og mun betur en ég reyndar. Nú þarf ÉG að taka mig á !
Alls hafa fokið 2.1 kg, fituprósentan hefur lækkað um 3.3% og 12 cm horfið af okkur fjórum í heildina.

Ég reyni líka að vinna einsog ég mögulega get. Er að vinna 10-11 tíma á dag svo dagarnir eru frekar einhæfir: hjóla í vinnuna, vinn, hjóla í ræktina, æfi, borða og sef.

Ætla núna að drífa mig og taka brennslu í ræktinni yfir So you think you can dance. Ekki veitir af.. Ég ætla að sýna góðan árangur í næstu mælingu !

…ætla að enda þetta á smá syrpu sem við tókum um helgina á leiðinni austur. Vorum með smá þema: hopp á klukkutíma fresti. Myndirnar eru teknar (í þessari röð) við Seljalandsfoss, Skógarfoss, Lakagígahraun, Skeiðarársand, Jökulsárlón og undir rótum Vatnajökuls.

   
Seljalandsfoss                 Skógarfoss                     Lakagígahraun

  
Skeiðarársandur          Jökulsárlón                    Klettar við rætur Vatnajökuls

 

Nánari upplýsingar

Þá er farin að koma mynd á þessa 10 vikna áskorun.  Breytti úr 12 vikum í 10 þar sem það hentar betur og er þá síðasta mælingin í lok ágúst. Við erum nú þegar orðnar um 6 sem ætlum að vera með og viljum endilega fá fleiri með okkur. The more – the merrier.

Fyrsta mæling verður á mánudaginn eftir viku (staðsetning verður birt innan skamms). Síðan á 2ja vikna fresti fram að hausti. Dagsetningarnar eru því:
   22. júní
   6. júlí
   20. júlí
   3. ágúst
   17. ágúst
   31. ágúst

Hugmyndin er semsagt sú að við æfum allar einsog okkur hentar best og hittumst svo á 2ja vikna fresti þar sem ég mun sjá um mælingar og halda utan um allt saman. Getum tekið fyrir-eftir myndir mánaðarlega ef áhugi er fyrir hendi. Lykillinn er þó að hafa gaman í góðum félagsskap, ná markmiðum okkar og njóta sumarsins í botn.

Einsog fram kemur í færslunni á undan er hægt að skrá sig í hóp 1 og mæta frítt í mælingar eða hóp 2 þar sem ég bý til æfingaprógram og/eða fer yfir matardagbók gegn mjög vægu gjaldi. (Þótt þetta heita hópur 1 og hópur 2 þá verðum við allar saman, þetta er ekki tvískipt.)

Þið sem ætlið að vera með (allar -líka þær sem hafa þegar skráð sig), endilega fyllið eftirfarandi spurningalista út og sendið mér á kristingrims@gmail.com.

Vil líka leggja áherslu á að það mega allir vera með, þið þurfið ekki að þekkja mig til að geta tekið þátt.  Það er alltaf gaman að kynnast nýju fólki og hjálpast að við að lifa heilbrigðum lífsstíl. Og þið megið vera í allskonar formi -feitar, mjóar, stórar og litlar. Þetta snýst bara um að bæta sjálfan sig og ná sínum persónulegu markmiðum.

Hlakka til að heyra frá ykkur og láta þetta verða að veruleika. Þetta er alvöru, við verðum orðnar þrusukroppar í haust !

 

12 vikna átakshópur

Hausinn fór á flug á meðan ég maraði í hálfu kafi í baði.

Er búin að fá marga pósta frá ólíklegasta fólki sem fylgist með hér á síðunni og þá sérstaklega þegar ég skrifa “heiluspistlana”. Mér finnst virkilega gaman hvað margir hafa áhuga á heilsusamlegum lífsstíl og eru að vinna í þeim málum. En er ekki svolítið leiðinlegt að gera þetta hver í sínu horni ? Þetta er nefnilega oft erfiðara yfir sumartímann -einmitt þegar það ætti að vera skemmtilegast. Veðrið er svo gott að maður getur hámarkað útivistina.

Var að láta mér detta í hug að sameina þá sem hafa áhuga í 12 vikna átakshóp. Áskorun á okkur sjálf að ná ákveðnum markmiðum innan þess tímaramma. Hver æfir á sínum stað eftir hentugleika en svo hittumst við aðra hverja viku og höfum ástandsmælingu (vigtun, ummál, fituprósenta). Þetta myndi þá ganga þannig fyrir sig:

1. Þeir sem vilja gera allt sjálfir
     Þú sendir mér póst og skráir þig. Ég sendi þér til baka spurningalista um þitt heilsufar og markmið.
     Þá mætiru í upphafi í mælingu og svo aðra hverja viku, ásamt öllum hópnum og förum svo t.d. öll saman í sund, útihlaup, fjallgöngu eða annað.
     Kostar ekkert.

2. Þeir sem vilja aðstoð
      Þú sendir mér póst og skráir þig. Ég sendi þér til baka spurningalista um þitt heilsufar og markmið, sem þú svo skilar mér til baka. 
      Ég bý til prógram sem hentar þér og þínum markmiðum gegn vægu gjaldi (ca. 3000 kr. p/mánuð) og get einnig farið vikulega yfir matardagbók (5000 kr fyrir bæði). 
       Þá mætiru í upphafi í mælingu og svo aðra hverja viku, ásamt öllum hópnum og förum t.d. öll saman í sund, útihlaup, fjallgöngu eða annað.
       Kostar 3-5000 kr. p/mánuð.

Þetta hentar öllum stelpum sem vilja ná árangri í sumar hvar sem þær eru staddar á landinu. Svona hópur stuðlar að aðhaldi og markvissum æfingum. Þetta hentar líka öllum þeim sem vilja ná árangri en tíma ekki/hafa ekki efni á einkaþjálfara.
Mér finnst einstaklega skemmtilegt að geta aðstoða aðra við að ná árangri og vil því ekki vera að taka fyrir þetta nema rétt minimum til að covera vinnuna, ef margir hafa áhuga á að taka þátt.
Ekki má svo gleyma hvað þetta verður ÓTRÚLEGA SKEMMTILEGT !

Sumarið ER tíminn ! Látum þetta verða skemmtileg, heilbrigt og líflegt sumar !

Einnig gæti verið möguleiki, til að auka hvatninguna, að leggja undir t.d. 5000 kr. Það myndi þá ganga þannig fyrir sig að þegar þú skráir þig þá legguru inn 5000 kr. og ef þú nærð markmiðum þínum (verða að vera háleit en raunhæf) þá færðu peninginn til baka -annars ekki !

Hvað segiði, er þetta e-ð sem ykkur líst á ? Ef þið hafið áhuga eða spurningar getið þið komið þeim til skila í gegnum komment eða á kristingrims@gmail.com.

Hlakka til að heyra frá ykkur !

 

Öfgar

Ég er mikil öfgamanneskja í öllu sem ég geri. Það er annaðhvort of eða van -ég rata sjaldan hinn gullna meðalveg. Ég er skapstór en jafnframt fljót niður. Ég er ofurskipulögð en á sama tíma ótrúlega viðutan. Ég er ofurglöð eða einfaldlega alveg miður mín. Og allt getur þetta gerst á innan við 5 mínútum. Alveg óútreiknanlegt.

Þetta á einnig við í mataræðinu og heilsusamlega lífsstílnum. Annað hvort borða ég 100% og hreyfi mig alla daga vikunnar og finnst ostsneið vera það allra óhollasta EÐA ég hreyfi mig alls ekki, borða óreglulega og mjög óhollt, t.d. ís í öll mál. Ég borða reyndar ALLTAF mikið -hvort sem það er hollt eða óhollt. Það er kannski minn helsti galli og ástæðan fyrir að ég verð aldrei grönn. Ég kann mér ekki hóf.
Það að hreyfa sig temmilega reglulega, borða tiltölulega hollt og hafa nammidag einu sinni í viku til að halda öllu í skefjum virkar einfaldlega ekki fyrir mig. Það er annaðhvort allt eða ekkert !

Síðustu 3 vikur hafa verið slæmir öfgar. Ís, brauð og nammi hefur verið í fyrirrúmi á meðan ég hef aðeins tekið 2-3 góðar æfingar á viku. Og það hefur skilað sér til líkamans. Skammarlegt, maður nær af sér skvabbinu og safnar því svo aftur til að missa það enn einu sinni..

En núna er ég byrjuð á góðu öfgunum sem vonandi haldast út sumarið. Höfum haft 3 kraftmiklar high intensity æfingar síðustu 3 daga  (sem sjá má í færslu hér á undan) og mataræðið hefur verið reglulegt og gott. Enda líður mér dásamlega. Þessu verður haldið áfram og vonandi get ég innan tíðar farið að nota flotta sundbolsbikiníið sem ég keypti mér í gær..

…og svona fyrst myndavélin er loksins orðin virk, þá er hún að sjálfsögðu ofvirk enda öfgarnir hér ekkert minni en í öðru. Þetta var kvöldmaturinn í kvöld.

Heimagerð heilhveitipíta með fersku íslensku grænmeti og prótein í mjólk með hindberjum.

 

Nýjasta æðið

Hreint skyr með rúsínum og eplum. I’m loving it !