Tækifæri Íslands

Í dag er ég háfleyg.

Ég er að byrja vinnuna að grein í Háskólablaðið (kemur út í febrúar 2010) sem ber vinnuheitið Tækifæri Íslands. Mig dauðlangar á þjóðfundinn sem haldinn verður á laugardaginn en því miður fékk ég ekki boðskort. Ég bíð þá bara eftir niðurstöðunum, en finnst þó synd að geta ekki tekið þátt. En kannski á annan hátt ?

Tækifærin eru nefnilega alls staðar. Sérstaklega núna. Á Íslandi er að losna úr læðingi kraftur sem hefur verið njörvaður niður. Einstaklingsframtakið, sem ég hef alltaf verið svo hlynnt án þess að vera blá, er að fara að virka fyrst núna því nú hafa allir möguleikann að byrja frá grunni. Á eigin forsendum. Þegar góðærið ríkti var þetta ekki einstaklingsframtak því fólk var mótað eftir kúnstarinnar reglum og aðeins útvaldir fengu að taka þátt. Yfirleitt þeir sem meira áttu. Hugmyndin sem var á lofti var ,,allir eru jafnir, bara misjafnir eftir því hvað fólk er duglegt að skapa sér tækifæri”. Auðvitað er þetta rétt en það sem vantaði var gagnrýnin hugsun. Ef þú komst langt varstu bara ,,duglegur að skapa þér tækifæri” og enginn spurði hvernig þú fórst að því. En ef þú varst láglaunamaður þá skiptiru engu máli því þú nenntir ekki að skapa þér þín eigin tækifæri. Þess vegna jóks stéttaskipting í þjóðfélaginu, vil ég meina.

En það sem ég vildi segja: það er fullt af fólki þarna úti sem er með góðar hugmyndir. Sumir hafa bolmagn til að koma hugmyndunum í verk -aðrir ekki. En fæddar hugmyndir deyja ekki svo glatt og þær skipta bara um eigndur ef hugmyndasmiðurinn lætur þær frá sér. Og þeir sem hafa bolmagn til framkvæmda eiga að grípa hugmyndirnar -grípa tækifærið- og skapa verðmæti.

Mig langar að biðja ykkur ef þið hafið hugmynd eða þekkið fólk sem hefur hugmynd að hafa samband. Eða benda mér á fólk til að hafa samband við. Það mega vera allskyns hugmyndir en helst þó að hafa það sameiginlegt að vera hugsjón og mögulegt tækifæri fyrir uppbyggingu Íslands. Þetta þarf ekki að vera stórt því allt byrjar smátt.  

Hvet ykkur eindregið. Við erum öll Íslendingar sem látum okkar Ísland varða og öll höfum við hugmyndir sem geta gert gott.

kristingri08@ru.is

 

Til allra mæðra..

Ég spyr ykkur allar, bæði núverandi mæður og verðandi:

Hvers virði er meðgangan ?

 

Áhugasviðssól

Þótt rigningin úti ætli engan enda að taka þá skín samt sólin -áhugasviðssólin.

Ég lenti í úrtakshóp hjá meistaranema í Kennslu- og lýðheilsudeild HÍ, sem er að kanna virkni Bendils, sem er einskonar áhugasviðskönnunarforrit (fremur óþjált orð).
Ég er alltaf til í að taka þátt í könnunum og þá sérstaklega áhugasviðskönnun, sem margir borga fúlgur fjár til fá að fara í (sem við reyndar gerðum vorið 2007).

Niðurstaðan var svo þessi fallega sól.
Hún segir mér að áhugasviðið mitt liggi helst á athafnasviði, skipulagssviði og félagssviði. Þá á vísindasviði, minna á listasviði og minnst á handverkssviði (ættarskömm!). Ég ætti einnig skv. könnuninni að finna mér starf þar sem eftirfarandi þættir eru veigamiklir: íþróttir og heilsa, opinber stjórnsýsla, viðskipti og rekstur, fjármál, stærðfræði og hugvísindi.

Líst barasta vel á þetta !

 

Google…

… eru ekki lengi að tengja. Sniðugir þeir.

 

Eindahraðallinn í CERN (aftur)

Var að horfa á Ísland í dag þar sem þau voru að fjalla um eindahraðalinn í CERN. Skrifaði einmitt um þennan hraðal fyrr á árinu, í júní nánar tiltekið. Enn er þetta voðalega spennandi viðfangsefni, jafnvel þó þetta liggi ekki alveg innan míns áhugasviðs. Ætla því að birta aftur færsluna frá því í sumar og vona að þið skoðið linkinn sem ég læt fylgja með.

Í gærkvöldi sofnaði ég yfir úrslitaleiknum í EM og skreið svefndrukkinn upp í rúm eftir að Spánverjar höfðu tryggt sér sigur. Ég átti þó erfitt með að sofna þegar upp í rúm var komið því Jón Ágúst var enn frammi að horfa á heimildaþátt á RÚV -eða það hélt ég- sem var ansi hávær. Þegar hann svo loksins kom uppí  var hann yfir sig spenntur yfir því sem hann var að horfa á, sem hann fann víst á netinu en var ekki heimildaþáttur á RÚV. Þetta gífurlega spennandi viðfangsefni var eindahraðall sem er í smíðum hjá CERN ((European Organization for Nuclear Research) sem er stærsta öreindafræði/háorkueðlisfræði rannsóknastofnun heimsins.
Ég fékk því að heyra langa tölu um eindir (bæði raf- og rót), svarthol, upphaf lífsins og heimsendi, massalausan ljóshraða og nýtt fyrirbrigði sem mögulega hefur minni massa (er það mögulegt ?) en ljóshraði og fer þ.a.l hraðar og fleira sem ég engan veginn gat móttekið í dormi gærkvöldsins.
(Ég veit, koddahjalið hjá okkur er gífurlega skemmtilegt.)

Ég hafði engan áhuga á þessu í gærkvöldi. Bókstaflega ekki nokkurn. En Jón Ágúst gefst ekki svo glatt upp, enda finnst honum fátt meira spennandi en vísindi, hönnun og tæki, og fékk mig nú í kvöld til að skoða á You Tube fyrirlestur með dr. Brian Cox, eðlilsfræðingi hjá CERN. Það bókstaflega breytti öllu og ég ætla að láta þetta myndband fylgja með (rúmlega 15 mín) svo þið getið skoðað þetta líka.

Dr. Brian Cox er án efa skemmtilegasti eðlisfræðingur sem ég hef séð og gerir viðfangsefnið einstaklega áhugavert, spennandi og skemmtilegt. Hann lítur út einsog töff hljómsveitargæi. Reyndar með greitt í píku, en það er hægt að horfa fram hjá því -að mestu leyti allavega. Hann hlær skemmtilega kjánalega og fer með nördabrandara, sem eru bara fyndnir. Ef hann hefði kennt mér eðlisfræði í MA hefðu það verið uppáhalds tímarnir mínir en ekki, einsog þeir voru, þeir leiðinlegustu.

Ég hafði semsagt, eftir að hafa séð þetta myndband ásamt fleirum, meiri áhuga á doktornum heldur en rafalnum sjálfum, öfugt við Jón Ágúst. Mér finnst það áskorun og tilhlökkunarefni að fara í háskóla og í master eftir það, jafnvel doktor ef svo ber undir, ef maður hefur jafn gríðarlegan áhuga á náminu og hann virðist hafa. Að leggjast yfir fræðin og þyrsta í meiri vitneskju vegna gleðinnar.

Vísindin eru óendanlega spennandi, hvort sem það eru náttúruvísindi, læknavísindi, hugvísindi eða önnur vísindi. Ef að þeir  hjá CERN ná að uppgötva með þessum eindahraðali hvernig lífið á jörðinni varð til og úr hverjum við öll erum og allt í heiminum, einsog markmiðið er, þá yrði það ótrúlegt. Mesta uppgötvun sem gerð hefur verið.
Reyndar er sá galli á að sumir telja að hún geti valdið heimsenda. Big Boom. Aftur. Nema í öfugum tilgangi.

En hérna er myndbandið svo þið getið myndað ykkur sjálf skoðun, hvort sem það er á eindahraðalinum eða hinum bráðskemmtilega dr. Brian Cox.